No marco do festival de fotografía FFoco, os fotoxornalistas coruñeses ofrecen unha exposición na Parva, o bar do Mercado de San Agustín.

A mostra recolle 15 imaxes cedida por fotógrafos e fotógrafas profesionais que se venderán a un prezo único de 50 euros para enviar a Palestina a través dunha ONG. Entre os autores, hai fotoxornalistas da Coruña como V. Casteleiro ou Javier Alborés e profesionais galegos como Sabela Eiriz ou Carlos Folgoso que aportaron as súas creacións, de temáticas moi variadas, de xeito desinteresado. O evento decorrerá desde as 13.00 horas na terraza interior que o posto ten no mercado.

Esta iniciativa, impulsada por Alba Barbadillo e Ángela Casal, socias cooperativistas da Parva, cumpre o seu quinto ano no FFoco, sempre coa mesma intención: “Facer reflexionar ao público, aínda que, neste caso, en vez de impulsar unha temática vencellada ao mercado ou ao consumo, decidimos unha paréntese pola gravidade do que sucede en Palestina. Despois de ver moitas fotografías de destrución, fame e inxustiza naquel país, tiñamos que actuar para, dentro das nosas posibilidades, axudar a poboación que sofre as consecuencias do xenocidio israelí”.

As dúas agradecen aos 15 profesionais a cesión das imaxes e a Zlick, que se encargou da impresión das mesmas de xeito gratuíto.
Nado en 2017, FFoco consolidouse como o escaparate imprescindible para amosar e coñecer o estado actual da fotografía documental en Galicia, sendo o único festival destas características na comunidade.