O pleno da Coruña trasladou, co apoio de todos os grupos — PSOE, PP, BNG, a Marea Atlántica e tamén da concelleira non adscrita Isabel Faraldo, de Podemos– o respaldo aos traballadores de Teleperformance pola deslocalización do servizo que presta esta empresa para Unión Fenosa Distribución, do grupo Naturgy.
Os membros da corporación municipal expresaron este apoio a través dunha declaración institucional, á que deu lectura a alcaldesa, Inés Rei, e tamén co voto a favor de todos os grupos a senllas mocións, presentadas pola edil Isabel Faraldo, e polo BNG, respectivamente.
Nelas, apóianse as demandas dos traballadores e rexéitase o traslado do “80% do servizo” a Colombia, coa perda de postos de traballo e de calidade no servizo que, segundo recollen as mocións, leva. Tamén se pide á empresa –trátase dun servizo adxudicado a Teleperformance– que “reconsidere” a súa decisión. Así mesmo, demándanse medidas a Goberno central e Xunta.
En concreto, o BNG, segundo lembrou o seu portavoz, Francisco Jorquera, reclama cambios normativos para evitar a deslocalización destes servizos. Tamén incidiu, como o edil da Marea Atlántica, Alberto Lema, nos beneficios da empresa en Galicia.
O portavoz do grupo municipal socialista, José Manuel Lage, reprochou a Naturgy que non teñan “responsabilidade social” pese ao “arraigamento histórico” con Galicia, pero tamén instou á Xunta a implicarse neste asunto por ser “a competente en política industrial”. Desta forma, respondeu as críticas feitas desde o PP ao Goberno central.
AMPLIACIÓN DO CHUAC
No pleno, e antes do debate das mocións, saíu adiante, só cos votos de PP e PSOE, a modificación do Plan Xeral de Ordenación Municipal (PXOM) para o cambio de uso de parcelas do complexo hospitalario universitario da Coruña (Chuac) pola ampliación do mesmo. Nese espazo, estará localizados os servizos administrativos do hospital e o novo hotel de pacientes.
Este asunto suscitou de novo as críticas da edil non adscrita de Podemos, Isabel Faraldo; da da Marea Atlántica, María García, e da do BNG, Avia Veira, que cuestionaron o proxecto da Xunta pola localización das novas edificacións, as expropiacións que esixirá e o “impacto ambiental e urbanístico”.
De “scalextric” cualificaron Faraldo e Veira as infraestruturas viarias previstas na zona. A primeira pediu ao goberno local que non sexa “cativo” das demandas da Xunta, aínda que apoiou a ampliación, mentres que a edil do BNG recalcou que “a prioridade non é ampliar o Chuac mentres a Atención Primaria está a ser desmantelada”.
E é que tanto desde esta formación como da Marea Atlántica, como fixo tamén Faraldo e o grupo socialista, reclamouse persoal. “Falta transparencia e debate público”, argumentou tamén María García, que aproveitou a súa intervención para reclamar, ademais, ao goberno local, o inicio das negociacións sobre o novo orzamento.
O concelleiro de Urbanismo, Francisco Dinis, que se sumou ás demandas á Xunta de persoal e de orzamento para a sanidade, defendeu os cambios aprobados no pleno. “Unha cousa non quita a outra”, dixo sobre estas cuestións. Desde o PP, o seu edil Antonio Deus defendeu as actuacións da Xunta.
