Auténticas e simbólicas as Festas do Rosario que se celebraron esta pasada fin de semana na Coruña. A Asociación de Veciños da Cidade Vella traballou arreo para ofrecer unha marea de actividades para toda a familia.
A máxica Praza de Azcárraga foi un dos grandes fervedoiros culturais. Acolleu o xoves o pregón de Luís Pousa e ao longo da fin de semana foi recibindo músicos familiares como Sito Sedes ou Pablo Díaz, contacontos como Pablísimo, ou concertazos como o que ofreceu Exit na calurosa noite sabatina.
View this post on Instagram
Unha das grandes citas do programa era o concerto que Los Enemigos deron a noite do venres no Parrote. Cuarentóns e cinquentóns botaron de menos unha barra onde levar algo á boca, pero gozaron e cantaron os míticos temas da banda de R&R que tanto vén por Galicia.
O domingo foi tempo de hockey, claro, no Dominicos, e sesión vermú entre Troncoso e a Praza da Constitución, outros dous espazos ben acaecidos para acoller eventos culturais.
As Noites do Ciclo de Concertos continúan este 13 co Concerto de Cámara na Capitanía e o 15 co concerto matinal no Museo de Belas Artes e pola tarde na Igrexa de Santo Domingo.
