O Tribunal Superior de Xustiza de Galicia (TSXG) confirmou a sentenza na que a Audiencia Provincial da Coruña condenara a un veciño de Arteixo por agredir, en novembro de 2018, ao concelleiro de Urbanismo do municipio porque o Concello non solucionaba os problemas de corte de subministración de auga que tiña a súa nai.

Os maxistrados de primeira instancia considerárono en abril autor dun delito de atentado á autoridade e doutro de lesións, polos cales lle impuxeron un ano de cárcere e o pago dunha multa de 2.520 euros. Ademais, terao que indemnizar á vítima con 1.588 euros.

O alegou ante o TSXG que non consta suficientemente probado que a súa acción tivese “ánimo de menoscabar a autoridade da vítima, pola súa condición de concelleira de Urbanismo” e atribuía o ocorrido “a un tema persoal” e, por tanto, “alleo ao ámbito de actuación pública do agredido”.

A Sala do Civil e Penal, con todo, indica que os feitos probados, non contradicidos, “fan expresa referencia a que o acusado, ademais de coñecer á vítima, era sabedor da súa condición de concelleira, así como a que a agresión foi a consecuencia de que o consideraba responsable” polos problemas de subministración no domicilio da súa nai.

Ademais, os maxistrados rexeitaron a tese do recorrente que expuxo como alternativa á cualificación dos feitos como delito de resistencia, baseándose en que non habería acometida. Así, subliñan que “novamente o argumento choca frontalmente co relato dos feitos probados”.