O titular da Deputación da Coruña, Valentín González Formoso, e o seu homólogo da Real Institución Benéfico Social Padre Rubinos, Eduardo Acea, asinaron o convenio para o financiamento do programa de mantemento físico e cognitivo das persoas usuarias do complexo xerontolóxico da entidade.
O programa conta cun orzamento de 169.146,69 euros, dos que a Deputación achega 135.317,35 euros, o 80% do total, e busca garantir ás persoas usuarias un envellecemento activo á vez que se mellora a súa calidade de vida.
Os obxectivos principais son previr e adaptarse ao estado de saúde das persoas usuarias, crear espazos terapéuticos nos que sentan seguras e páseno ben, evitar que a pasividade se instale, organizar e integrar actividades nas súas rutinas diarias e fomentar a independencia e a autonomía.
A tal fin desenvólvense diferentes actividades, algunhas do ámbito terapéutico, como ximnasia, música e movemento, paseos ou máquinas biosaudables; outras son cognitivas e de rehabilitación neuropsicolóxica, como o taller de prensa, o club de lectura ou as tardes audiovisuais; e tamén as hai de dinamización, como xogar aos birlos, ao bingo, talleres de manualidades ou de pintura.
O presidente da Deputación da Coruña, Valentín González Formoso, destacou a importancia de “apoiar, desde as administracións públicas, este tipo de iniciativas sociais que permiten, a través de diferentes institucións, chegar a cubrir necesidades e demandas moi diversas”.
