A sección segunda da Audiencia Provincial da Coruña condenou a 11 anos de cárcere a un home por abusar, de forma continuada, da súa fillastra.

Ademais, tal e como relata o Tribunal Superior de Xustiza de Galicia (TSXG) nun comunicado, impuxéronselle seis anos de liberdade vixiada; a prohibición de aproximarse e de comunicarse coa vítima durante un período de tempo superior en sete anos á pena privativa de liberdade imposta; e o pago dunha indemnización de 25.000 euros.

O tribunal ordena que se deduza testemuño das actuacións das dúas fillas do acusado, unha das cales alertou á policía tras sorprender ao seu pai cando saía do dormitorio da súa media irmá, pola presunta comisión dun delito de falso testemuño polas declaracións que prestaron no xuízo.

O tribunal indica na sentenza que a afectada, nacida en 1994, “adoece dunha minusvalía dun 43 %, tras sufrir un traumatismo cranioencefálico á idade de 5-6 anos, con secuelas a nivel de concentración e atención, e capacidade intelectual límite, con dificultades para a comunicación por mor dos seus problemas graves de disfemia”.

Segundo os maxistrados, o relato da afectada “resultou sincero, crible, consistente e persistente, sen que iso se poida asimilar a unha repetición mimética ao describir o sucedido”. Ademais, destacan que non se aprecia “nin a existencia de contradición algunha relevante nin a presenza de ningún móbil de vinganza contra o procesado”.

Apuntan tamén que concorren corroboracións periféricas da súa declaración, avalada tanto pola proba pericial como polas testificais dos axentes que acudiron ao domicilio familiar e dunha amiga da prexudicada.