O Concello da Coruña puxo en marcha unha plataforma de contratos co que se converte no primeiro consistorio en ter unha ferramenta deste tipo a disposición da cidadanía, segundo informou o portavoz do goberno local, José Manuel Lage.

Fíxoo na presentación desta iniciativa ante os medios de comunicación. O tamén concelleiro de Economía, Facenda e Réxime Interior explicou que a mesma se pode atopar no apartado de transparencia da páxina web do concello.

Desta forma, sinalou, calquera cidadán ou cidadá poderá consultar desde hoxe, e en tempo real, os contratos da administración e os procedementos sucesivos para a súa adxudicación.

“Hoxe damos un paso na transparencia do Concello, un paso que non ten marcha atrás, coa posta a disposición da cidadanía dunha ferramenta na que se poden consultar todos os contratos da administración municipal desde o 2018“, sinalou o portavoz municipal.