A asociación cultural O Mural anunciou este mércores a súa solicitude para lograr a declaración de ben de interese cultural dos murais que o pintor coruñés Urbano Lugrís realizou no baixo e a entreplanta dun inmoble da rúa Olmos da Coruña.

Segundo informou a organización nun comunicado, esta solicitude realizouse co fin de adoptar as “medidas precisas” para conservar os frescos e garantir o acceso do público ás obras muralísticas.

Así mesmo, desde a asociación cultural O Mural criticaron que o Concello da Coruña aínda non deu resposta á solicitude enviada en xuño de 2021 para realizar unha inspección que comprobe o estado dos frescos que Urbano Lugrís pintou na rúa Olmos e que, en caso necesario, adopte medidas para a súa conservación.

“O goberno local ten competencia nesta materia tal e como establece o artigo 11 da súa propia Ordenanza de conservación e rehabilitación de inmobles”, cuestionaron desde a asociación cultural O Mural.