O candidato da Marea Atlántica á Alcaldía da Coruña, Xan Xove, e a portavoz do grupo municipal, María García, reclamaron ao goberno local medidas para “frear” a proliferación de vivendas de uso turístico.

En rolda de prensa, cuestionaron o posicionamento do mesmo á súa proposta para implantar unha moratoria dun ano na autorización deste tipo de pisos. “Presentamos unha iniciativa con encaixe legal, e que podería aprobarse este xoves no pleno, para frear a proliferación e iniciar a regulación dun sector que agora crece sen control“.

“Podería facerse, pero Inés Rey impediuno”, dixeron sobre a alcaldesa. E é que a Marea Atlántica denunciou que non se permita o debate e a votación da iniciativa en pleno.

“Faino renunciando a exercer as competencias para plantarlle cara a un problema que todos os estudos sinalan como unha causa decisiva da subida do prezo dos alugueres“, apostilou Xan Xove.