Os sindicatos CIG e UGT desconvocaron este mércores a folga prevista nos centros de Televés na Coruña tras alcanzarse un principio de acordo na mesa negociadora do convenio colectivo.

Este preacordo supón a suspensión do paro previsto para este xoves, así como a folga indefinida que comezaría o próximo 23 de xaneiro. O seguinte paso será sometelo á asemblea de traballadores.

No documento prevese unha vixencia para o convenio de 2022 a 2025 e incorpora unha cláusula de revisión salarial para os tres últimos anos, onde se garantirá o sumatorio deses anos máis un 0,5 %.

Así, os incrementos salariais serán do 4,5 % en 2022, do 3,5 % en 2023, do 3 % en 2024 e do 2,5 % en 2025.