Os alcaldes e alcaldesas da área metropolitana da Coruña que integran o Consorcio das Mariñas reuniranse a partir da próxima semana para abordar o futuro da planta de tratamento de residuos de Nostián. “Será a partir do luns 23 porque por cuestións de axenda non se podía facer antes”, concretou a rexedora coruñesa, Inés Rey.
Fíxoo a preguntas dos xornalistas nunha rolda de prensa, na que tamén foi cuestionada polas declaracións da conselleira de Medio Ambiente, Ángeles Vázquez, sobre a autorización ambiental á empresa Limpoil para instalar unha planta de tratamento de residuos oleosos procedentes de buques nos peiraos de Oza. Respecto diso, apuntou que existen “localizacións máis apropiadas” para a súa instalación “como pode ser o porto exterior”.
En canto aos orzamentos municipais deste ano, cuestionada sobre a data na que estará dispoñible o borrador, Inés Rey replicou cun “pronto”, despois das demandas feitas a este respecto pola oposición.
A rexedora fixo estas declaracións tras a presentación da programación de concertos da Banda Municipal de Música da Coruña para o primeiro semestre de 2023 que inclúe máis de 40 actuacións. No acto, estivo acompañada polo director da agrupación, Juan Miguel Romeu Llopis.
