O Concello da Coruña pecha os accesos ao paseo marítimo, praias e parques para reforzar o dispositivo de seguridade ante a alerta por temporal, segundo informa.

Tras confirmar nesta xornada o peche de parques e praias, avanza que o martes seguirá a medida, mentres insta á cidadanía a extremar as precaucións e a non achegarse ao bordo costeiro, así como afastarse das praias e lugares que poidan estar afectados as mareas e as ondas debido á intensidade do vento, así como a non situarse nos extremos dos peiraos ou espigóns da cidade.

Por outra banda, o Concello tamén recomenda non circular convehículos polas estradas lindeiras á liña de praia no paseo marítimo, así como afastarse de cornixas, muros, árbores ou valos publicitarios.

A maiores, a Policía Local recomenda, como medida de carácter preventivo nos fogares, a retirada de testos e de todos aqueles obxectos que sexan susceptibles de precipitarse á rúa debido ao vento e a choiva.

Tamén activou un dispositivo de emerxencia para acoller ás persoas sen fogar da cidade. A partir das 21,00 horas de hoxe, as persoas que o desexen poderán pasar a noite no centro cívico dos Mallos, onde se lles ofrecerá comida, bebidas quentes, roupa seca e sacos de durmir.