O Concello da Coruña publicou as propostas gañadoras dos orzamentos participativos nas que se investirán 2,5 millóns de euros e que se poden consultar na web municipal.
Son 17 as propostas, cinco para toda a cidade e 12 correspondentes aos 10 distritos da Coruña, as máis votadas no proceso de participación cidadá que levou a cabo a finais do pasado ano.
Ademais destas 17 propostas, o equipo técnico municipal valorou o emprego dos remanentes para a inclusión dunha proposta máis nos distritos 1 ou 8, os únicos que non conseguiron o límite de orzamento asignado por distrito.
Seguindo o criterio de maior número de votos, inclúese a maiores o proxecto de creación dunha zona de lecer no barrio de Palavea, para cuxa posta en marcha o Concello achegará 90.500 euros que se sumarán aos 2.500.000 euros consignados para os Orzamentos Participativos.
CENTRO DE DÍA
Por outra banda, este luns a alcaldesa, Inés Rey, e a concelleira de Igualdade, Benestar Social e Participación, Yoya Neira, recibiron ao presidente e á directora de Adaceco (Asociación de Dano Cerebral da Coruña), Juan Luís Delgado e Natalia de Llano, nunha reunión na que abordaron a construción do seu centro de día, para o que o Concello cedeu terreos municipais.
A alcaldesa comprometeuse a solicitarlle á Consellería de Política Social da Xunta de Galicia un compromiso para o financiamento deste centro “esencial para A Coruña e a súa área”.
