O Concello da Coruña publicou as bases de participación nos concursos previstos na próxima edición do entroido, que inclúe a competición de comparsas, carrozas, infantil de disfraces e choqueiros.

O concurso de comparsas resolverase nun festival que terá lugar o sábado 11 de febreiro, ás 18,00 horas, en Palexco. A gañadora interpretará dúas cancións no acto de entronización do Deus Momo, o venres 17 de febreiro ás 21,00 horas, no Obelisco.

As carrozas deberán participar no desfile que percorrerá o Cantón Pequeno ata a praza de María Pita, o sábado 18 a partir das 17,30 horas. O Concello establecerá un mínimo de tres premios en metálico en tres categorías, que oscilan entre os 800 e os 1.500 euros, así como galardóns á orixinalidade e accésits.

Os concursos infantís terán lugar o martes 21 de febreiro, desde as 17,00 horas no Campo da Leña; con premios entre os 50 e os 150 euros para lotes de libros de literatura infantil.

Ese mesmo día celebrarase tamén a competición de choqueiros a partir das 20,00 na rúa La Torre. Os galardóns oscilan entre os 150 e os 600 euros.