O presidente de Renfe, Isaías Táboas, e a alcaldesa da Coruña e presidenta do Consorcio de Turismo, Inés Rey, asinaron en Madrid un acordo de colaboración para impulsar o turismo na Coruña e as viaxes en tren como principal medio de transporte para chegar á cidade.
A firma do acordo tivo lugar nas oficinas centrais de Renfe en Madrid, e á mesma asistiron, ademais de Táboas e Rey, o concelleiro de Turismo da Coruña, Juan Ignacio Borrego, e o xerente de Turismo da cidade galega, Moisés Jorge Naranjo.
Ambas as entidades traballarán conxuntamente para promocionar A Coruña como destino turístico e de negocios utilizando o tren como transporte. Para iso, difundiranse actividades turísticas e culturais, campañas conxuntas e eventos a través de diferentes canles de comunicación comercial.
Renfe ofrecerá un 10 % de desconto sobre a tarifa aberta ao público aos asistentes e expositores das actividades que leven a cabo para promocionar o turismo de congresos, convencións e aqueloutros eventos que celebre ou organice o Consorcio. A empresa tamén ofrecerá o mesmo desconto sobre o prezo de referencia a todo viaxeiro que contrate escapadas temáticas ou de turismo.
