Ao redor de 500 persoas manifestáronse este domingo en Carral contra o que denominan a “aprobación masiva de polígonos industriais eólicos”, onde censuraron a “violencia institucional” que exerce a Xunta, “que non é un Goberno que coordine políticas públicas para garantir a cobertura de necesidades da poboación, senón o departamento comercial das eólicas”.
A manifestación, convocada pola asociación Salvemos o Val de Barcia e o Monte Xalo, e apoiada polo Sindicato Labrego Galego (SLG), arrincou do Monumento aos Mártires de Carral e discorreu pola vía principal do municipio ata finalizar fronte ao Concello de Carral. Alí leron o manifesto da convocatoria, onde lamentaron que “os partidos políticos que ocupan a Xunta e o Goberno estatal convertesen estas institucións en meras xestorías de negocio do oligopolio enerxético“.
“A tramitación en tempo marca de 120 polígonos industriais eólicos, cunha celeridade nunca vista cando se trata de atender demandas da poboación, nin tan sequera en cuestións esenciais como a atención sanitaria, a atención á dependencia ou o dereito a contar cun modelo de produción de alimentos de proximidade que garanta alimentación de calidade, recalcan unha vez máis que as formacións políticas están dispostas a atacar o benestar da cidadanía para favorecer os multimillonarios beneficios das corporacións privadas”, censuraron.
“Esiximos á Xunta que explique que tipo de procedemento de tramitación permitiu que expedientes que non puideron ser resoltos durante meses fosen ditaminados agora en cuestión de días”, recalcan.
