O consello de administración da Autoridade Portuaria da Coruña aprobou este martes a proposta de desenvolvemento da zona sur do porto exterior, destinada ás empresas que estean interesadas en instalar plantas de fabricación de compoñentes de eólica mariña.
No consello, o presidente da entidade, Martín Fernández Prado, informou, ademais, dos datos de tráficos e económicos ao peche de 2022, cun crecemento superior ao 25% no movemento de mercadorías “e rexistros históricos en canto a cifra de negocio e beneficios”, sinala o organismo portuario.
Sobre o proxecto de ordenación da zona sur de Punta Langosteira, explica que ten o obxectivo de garantir a eficiencia na adxudicación deste espazo do porto exterior “que na actualidade está sen uso, xa que as actuais concesións para o tráfico de mercadorías concéntranse na zona norte”.
“Ponse en marcha porque, no marco do proxecto Green Port, recibíronse diferentes solicitudes de empresas para habilitar centros industriais vinculados coa eólica mariña, con destino á exportación, e coa xeración e almacenamento de hidróxeno e amoníaco verdes”, engade.
