Dúas décadas leva esperando o barrio da Falperra pola reforma do Mercado de Santa Lucía. Un proxecto que leva sufrindo anos de promesas baldías e propostas desaparecidas, coa veciñanza en loita durante moitos anos chegando a colleitar 3.000 sinaturas para que Concello e Xunta puxesen a andar o proxecto. De feito, ambas administracións, protagonistas dun sinfín de demostracións de deslealdalde entre partidos, aseguraban en 2021 na sinatura do convenio, que podería estar listo antes de rematar o 2023, cousa que xa é impensable.

En calquera caso, parece que a rehabilitación se volve poñer en marcha coa aprobación, na Xunta de Goberno desta mañá de mércores 15 de febreiro, das bases administrativas do concurso de ideas para que o edificio albergue un novo Mercado Municipal (de 400 metros cadrados), un Centro de Saúde e Centro Cívico.

Trátase entón de volver escoller proxecto no que se prevé un investimento de 8,3 millóns de euros. O concurso, que ten un prazo de 45 días, ten un orzamento de 45.000 euros en premios para animar ao estudos de arquitectura a presentar ofertas. Haberá un primeiro premio de 20.000 euros, un segundo de 10.000 euros e dous accésits, de 5.000 euros cada un. O autor ou autora do proxecto gañador encargarase tamén da redacción dos proxectos básicos e de execución, así como da dirección de obra, para o que se prevé un investimento máximo de 473.000 euros.