Delegados e delegadas da CIG no sector da construción concentráronse este xoves diante da patronal coruñesa para demandar “un convenio colectivo digno que garanta a recuperación e o mantemento do poder adquisitivo dos salarios”.

Na protesta, convocada pola FCM-CIG, denunciouse que o persoal ten conxelados os salarios desde 2021 e “é hoxe un 10% máis pobre que fai tres anos”. Durante a concentración ante a sede da Asociación Provincial de Empresarios da Construción, lembrouse que na actualización de 2021 xa tivo lugar unha perda do poder adquisitivo do 4%.

“Desde entón, os traballadores e traballadoras seguen sen ver crecer os seus soldos nin cobrar os atrasos de 2022 (cando o IPC foi do 5,7%), nin tampouco do que vai de 2023”, sinalan desde a CIG.