Un cruceiro, o ‘Aida Bella’, atracou este xoves no porto da Coruña con axuda de remolcadores polo forte vento rexistrado nas últimas horas. Así o confirmaron desde a Autoridade Portuaria da Coruña, que precisaron que “cando hai situacións de fortes refachos de vento, interveñen os remolcadores para asegurar a manobra”.

Ademais, precisaron que se fai atendendo á normativa existente a este respecto. No entanto, dixeron que non houbo máis incidencia e que os 2.000 pasaxeiros están agora coñecendo a cidade.

O cruceiro chegou ao porto herculino procedente do Reino Unido e fixo a atracada no horario previsto, ao redor do oito da mañá. Pola tarde, sobre as 18,00 horas, partirá destino a Madeira (Portugal). Nos aeroportos galegos non houbo ningunha incidencia, segundo precisaron desde Aena ao ser consultados pola posible repercusión do vento nos mesmos.