Centenares de persoas manifestáronse este sábado na Coruña, fronte á Delegación do Goberno, para demandar ao Executivo que retire o Plan de Ordenación de Eólica Mariña (POEM) e que, aseguran, pode “acabar co sector pesqueiro máis puxante de España e de Europa”.
Á concentración, convocada pola plataforma Eólica Así Non, asistiron representantes dalgunhas das 200 entidades sociais do ámbito pesqueiro, ecoloxista e social, non só de Galicia, senón tamén de Asturias e Portugal.
Ademais da retirada do POEM, tal e como explicou o Patrón maior de Burela e presidente da Plataforma en Defensa da Pesca e os Ecosistemas Mariños, Basilio Otero, solicitan a dimisión da ministra de Transición Ecolóxica e Reto Demográfico, Teresa Ribera, e unha reunión co presidente do Goberno para exporlle a súa situación.
“Pedimos que nos deixen traballar, que teñan en conta que a pesca fixa poboación ademais de levar á mesa alimentos saudables“, afirmou Otero. A plataforma insta ademais a que se fagan os estudos de impacto ambiental pertinentes xa que, explican, non contan con ningún tipo de información respecto diso.
ZONAS DE RESTRICIÓN
“O que se ve nos POEM é só unha parte da fotografía. Hai un impacto que non se ve, como o do cable que leva a enerxía a terra, que non está debuxado. E aí tamén hai zonas de restrición onde non se pode faenar“, explica Otero en base aos datos que, din, teñen dos parques instalados en Portugal.
“As enerxías renovables si, pero non desta forma, esnaquizando o litoral. Non queremos a eólica mariña porque vai ser unha desfeita para o sector da pesca artesanal e litoral, unhas artes a protexer que dan moitos postos de traballo”, relatou o Patrón maior de Cangas do Morrazo, Javier Costa.
Doutra banda, a plataforma estuda recorrer ante o Tribunal Supremo o Decreto, polo que traballan nun informe xurídico para ver se é viable. “Este é o pistoletazo de saída na loita que imos emprender contra o Goberno. Imos chegar ata o final“, alertou o mariñeiro asturiano e vicepresidente da plataforma, Adolfo García Méndez.
“GOLPE MORTAL” PARA O BNG
Tamén participaron a portavoz nacional do BNG, Ana Pontón; o deputado nacionalista no Congreso, Néstor Rego, e outras figuras da formación nacionalista como Ana Miranda, Francisco Jorquera ou Mercedes Queixas.
Pola súa banda, Ana Pontón expresou o apoio do BNG ás demandas dos manifestantes e xustificou a súa presenza na concentración para “dicir alto e claro que non se pode permitir que se destrúan miles de postos de traballo no mar, que una das columnas vertebrais da economía galega”.
“Vai supor un golpe mortal para a pesca“, aseverou. Lembrou ademais algúns datos achegados pola Universidade de Santiago respecto ao peso económico do sector, sinalando que a pesca supón o 2% do PIB de Galicia, máis de 31.000 postos de traballo.
“Queren converter a Galicia nunha colonia enerxética de Madrid. A nosa costa non está en venda, non é un lugar onde as eléctricas sigan facendo caixa. Pedimos que Galicia sexa un lugar libre de eólica mariña”, defendeu Pontón, que sinalou ademais que nos lugares onde xa se instalou “os resultados foron nefastos”.
