O Concello da Coruña activa este mércores o novo Bono Cultura 2023 para persoas usuarias. Esta nova convocatoria conta cun orzamento de 260.000 euros e busca dinamizar e apoiar o sector cultural coruñés, incentivando a compra de produtos.

Segundo informa o consistorio, xa hai 34 establecementos adheridos a este plan e o prazo de inscrición continuará aberto para que máis negocios sigan adheríndose.

O Bono Cultura 2023 suporá un desconto do 50% do valor económico dos bens, produtos e servizos culturais que compren persoas usuarias, a condición de que sexa nos establecementos ou empresas prestadoras de servizos que estean adheridas a esta campaña.

Estes bonos van dirixidos a persoas maiores de 14 anos, sexan ou non residentes na Coruña. Cada persoa usuaria só poderá descargar un tipo de bono das categorías desta edición.