A Coruña acolle desde este martes a mostra ‘Sinaladas’, que recolle a loita das mulleres galegas no século XX e que estará exposta ata o 27 de marzo no Cantón Grande, á altura do Obelisco.

A exposición está concibida para expor nun espazo público e divulgar a figura das mulleres e dos movementos nos que participaron, desde as revoltas agrarias, pasando pola situación educativa da muller durante a II República, a represión durante o franquismo ou o exilio ata a participación na resistencia e a loita para conseguir a democracia.

Promovida pola área de Cultura da Deputación da Coruña, á súa presentación asistiron o deputado de Cultura, Xurxo Couto; a presidenta da Agrupación Cultural Alexandre Bóveda, María Xosé Bravo; o historiador Carlos Babío e a comisaria da mostra, Montse Fajardo.

Para Xurxo Couto, trátase dunha iniciativa que segue un camiño en defensa de “a recuperación da memoria histórica“, dixo lembrando o proceso da institución provincial para a recuperación do Pazo de Meirás.