O concelleiro de Urbanismo, Vivenda, Infraestruturas e Mobilidade do Concello da Coruña, Francisco Díaz Gallego, avogou por “escoitar a todos os sectores” para regular os pisos turísticos. Fíxoo tras un encontro con diversas asociacións e entidades para escoitar as súas propostas e demandas para o desenvolvemento dunha normativa específica.

En concreto, reuniuse con representantes da asociación de hostalaría e hospedaxe, de vivendas turítiscas, de promotores inmobiliarios ou do Colexio de Axentes da Propiedade Inmobiliaria.

O obxectivo, subliñou Díaz Galego, é “escoitar a todos os sectores afectados” para acordar as posibles medidas a executar, que poderían pasar por unha modificación do Plan Xeral de Ordenación Municipal vixente e pola aprobación dunha nova ordenanza.

Para tal fin, o goberno local constituirá unha mesa de traballo cos distintos sectores, á que se convidará á Federación de Asociacións Veciñais da Coruña e Área Metropolitana. “Buscamos que haxa pluralidade e prestar atención a todas as partes implicadas, sen perder de vista a evolución recente do mercado inmobiliario na cidade, especialmente no referente aos alugueres”, apuntou o concelleiro.

Noutra orde de cousas, o Concello da Coruña aprobou, en Xunta de Goberno local, o proxecto para a rehabilitación e mellora enerxética das fachadas do CEIP Víctor López Seoane, no barrio de Monte Alto.