O festival de cinema LGTBIQ+ ‘Norte Cinema Diverso’ acollerá a súa primeira edición no Teatro Colón da Coruña os días 21 e 22 de abril, cunha programación que inclúe nove curtas, catro documentais e dúas longametraxes.

O codirector do festival Fernando Cayazzo sinalou nun comunicado que o obxectivo é, a través do audiovisual, “destruír prexuízos e reflectir a loita do colectivo mediante a creación de referentes”, así como “dar visibilidade ás vidas e historias das persoas LGTBIQ+”.

En canto á programación, a quenda do sábado pola mañá, que inclúe a proxección de seis curtas, será gratis e contará coa presenza de centros escolares da cidade. O codirector Fito Ferreiro apuntou que o propósito da Asociación Palestra “é que os traballos chegue a toda a cidadanía, especialmente aos centros educativos”.

Así mesmo, as entradas para o venres e o sábado pola tarde pódense adquirir de forma anticipada na páxina web do Teatro Colón a un prezo de tres euros a sesión. ‘Norte Cinema Diverso’ conta coa colaboración do Concello da Coruña e a cinemateca da Fundación Pedro Zerolo. Así, as madriñas do certame son o patrocinador, Adegas Martín Códax, que dará nome ao premio Marieta Martín Códax a mellor cortametraje, e colectivos como Fundación 26D, Lles Coruña, Corufest, Orgullo Coruña, Pvulse, CUACFM, Casco Orgullo Valmiñor e Equipo Deas.