A sección primeira da Audiencia Provincial da Coruña xulgará este luns a un home acusado de agredir sexualmente de forma continuada a unha menor coa que gardaba relación familiar.

En concreto, segundo o escrito de cualificación fiscal, o acusado mantiña coa vítima, que non alcanzaba os 16 anos, unha relación de parentesco.

Nalgún momento do ano 2020, o home, apunta o Ministerio Público, “realizou continuos tocamentos á menor e continuas insinuacións de carácter sexual”, que cesaron cando ela contou o sucedido á súa nai.

Fiscalía solicita para o procesado cinco anos e sete meses de prisión, así como que se lle impoña a prohibición de achegarse a unha distancia inferior a 200 metros da nena, ao seu domicilio, lugar de estudo ou traballo, así como a prohibición de comunicarse con ela durante un período de seis anos. Tamén reclama para ela unha indemnización de 3.000 euros.