As entradas para o concerto que a banda alemá Scorpions ofrecerá na Coruña o 13 de xullo sairán á venda o luns, día 27, a partir das 11,00 horas, segundo informan os promotores.
Será no marco do Resurrection Fest Estrela Galicia e na xira que a banda máis lonxeva do hard rock europeo ofrecerá este ano, ‘Rock Believer Tour’. Actuarán nos peiraos da Coruña e nun concerto para o que as entradas sairán á venda a un prezo desde 65 euros. A cidade herculina será a única parada da banda en toda a metade norte do país.
Os alemáns son os autores de cancións como ‘Rock You Like A Hurricane’, ‘Wind Of Change’ ou ‘Still Loving You’ e a súa actuación será posible nos peiraos coruñeses tras o acordo alcanzado entre a Autoridade Portuaria e o Concello para albergar concertos no verán nesa zona.
