Despois de comezar a unir a Coruña con Xenebra (Suíza) e Londres (Reino Unido), o aeroporto de Alvedro suma hoxe o seu terceiro destino internacional. A conexión con Milán-Malpensa, a través da operadora EasyJet, estréase este martes ás 17:15h, e contará con dúas frecuencias semanais, os martes e sábados, durante todo o ano.
Cun fluxo de tráfico de aproximadamente 29.000.000 pasaxeiros por ano, Milán-Malpensa é o segundo aeroporto máis importante de Italia, despois do de Roma-Fiumicino.
A conexión con Ámsterdam, prevista no segundo semestre de 2023
A esta oferta, esperan dende o Concello que se sume no segundo semestre de ano unha nova liña co aeroporto de Ámsterdam-Schiphol, que tamén contará con EasyJet como compañía operadora.
A conexión con Ámsterdam activarase toda vez que se solvente a escasez de slots dispoñibles actualmente no aeroporto neerlandés, o máis importante dos Países Baixos.
