A folga de persoal de limpeza do Hospital Abente e Lago, na Coruña, quedou suspendida temporalmente tras o compromiso dunha reunión por parte da empresa concesionaria ao comité de folga para abordar a situación de cinco despedidos e “a posibilidade de readmisión”.

Así o apuntaron a Europa Press desde a CIG tras o acordo para unha reunión a raíz do peche de representantes de CIG-Servizos e do persoal de limpeza nas oficinas de Recursos Económicos. Sobre o cinco da tarde quedou suspendido a raíz do compromiso por parte da concesionaria, segundo explicaron desde a central sindical.

A orixe da folga que comezou o martes, día 11, estivo na decisión da adxudicataria, Lacera, de non subrogar a cinco traballadoras e traballadores que formaban parte do servizo e que, de acordo coa representación sindical, “tiñan dereito a ser incorporados”. Ademais, convocouse para denunciar a “sobrecarga” de traballo.