A sexta edición do ‘Corufest’ terá lugar do 4 ao 14 de maio con 12 espectáculos en diferentes espazos da cidade, segundo informaron os seus promotores nun acto xunto á alcaldesa da Coruña, Inés Rey.

Nesta ocasión, o festival explorará diversos campos artísticos de face a conseguir un “maior compromiso” coa diversidade afectivo sexual. “O noso obxectivo apoiando esta iniciativa é impulsar a cultura, fomentar a divulgación en materia de igualdade e dar visibilidade á diversidade”, remarcou a este respecto Inés Rei.

Nesta edición, ‘Corufest’ continuará apostando polo talento galego emerxente en combinación con importantes artistas do panorama da danza e doutras artes escénicas como o teatro. As sedes deste festival serán o Teatro Colón, o Teatro Rosalía de Castro, o auditorio e a biblioteca do Centro Sociocultural Ágora e a Fundación Luís Seoane.