O Museo de Belas Artes da Coruña inaugura o martes, día 25, un ciclo de cinema sobre a figura de Picasso no marco da conmemoración do 50 aniversario da súa morte. ‘Picasso a través do cinema’ comezará como parte das actividades deseñadas pola Xunta de Galicia ao redor da mostra ‘Picasso branco no recordo azul’.

O primeiro visionado será no auditorio do museo, ás 19,00 horas, cos filmes ‘Guernica’, de Robert Hessens, que trata a soada obra do artista, con imaxes de arquivo sobre o bombardeo nazi da poboación vasca. Ademais, tamén se proxectará ‘Picasso’, de Luciano Emmer, na que se profunda na evolución do artista.

O ciclo continuará ofrecendo cada martes de maio no Museo unha selección de obras que permitirán coñecer ao artista, explican desde a Consellería de Cultura. O 2 de maio será a quenda do documental de Henri George-Clouzot ‘O misterio Picasso’, ao que seguirán outras proxeccións.