Décadas levan as familias da rapazada máis deportiva da Coruña preguntándose por que a cidade cidade deportiva da Torre Arsenio Iglesias non ten unha cantina. Un espazo onde refuxiarse os días de temporal mentres @s máis de 18.000 nen@s adestran ou xogan (fútbol, baloncesto, tenis, padel, hockey…), onde tomar algo quentiño polo inverno e fresco polo verán. Unha cantina das que sempre hai nos campos.

Por fin, e tras ter este proxecto paralizado dende 2015, o Concello vén de anunciar que procederá a instalar unha cafetería tras recibir o informe favorable do Consello Territorial do Patrimonio Cultural de Galicia. Os traballos comezarán nos próximos días e teñen un prazo de execución de tres meses e estará operativa a partir de setembro.

A instalación dun módulo metálico prefabricado quedará asentado na cara leste do edificio do frontón da Torre. A cafetería quedaría deste xeito oculta desde a Torre de Hércules, un dos requisitos patrimoniais existentes.