A alcaldesa en funcións da Coruña e secretaria xeral dos socialistas coruñeses, Inés Rey, cualificou de “valente” a decisión do presidente do Goberno, Pedro Sánchez, de adiantar as eleccións xerais ao 23 de xullo tras o resultado dos comicios municipais.

“É unha decisión baseada no seu profundo espírito democrático“, argumentou Rey, quen trasladou o seu “respaldo” e “respecto” polo citado anuncio. Ademais, expuxo que nas xerais os españois deberán decidir “como afrontar este período de recuperación”. “Se cun goberno de dereita e ultradereita que vai aplicar máis recortes e con medidas antisociais ou cun modelo como o de Sánchez”.

“Cun despregamento de escudo social“, sentenciou Rey, para quen a elección está entre “retroceder” ou apostar por “un voto progresista e de futuro que lidera un único partido, o PSOE”. Cuestionada tamén polo feito de que o presidente da Xunta, Alfonso Rueda, optase por non adiantar as eleccións autonómicas, manifestou que se trata dunha cuestión que “lle compete” a este. “Terá os seus cálculos e motivacións”, dixo.