A Policía Local da Coruña dispón dun novo equipo de drones, que exhibiu na conmemoración da súa festividade. Foi con motivo dun acto celebrado no Palacio Municipal de María Pita e presidido pola alcaldesa en funcións, Inés Rey.

Nel, asegurou que a sociedade se enfronta a novos retos que requiren dispor dun corpo de policía “forte, implicado e máis alerta e coordinado que nunca”. Ademais, agradeceu o traballo levado a cabo polos axentes durante o último ano. “Hoxe é un día de homenaxe á Policía Local e, por extensión, a todos os corpos e forzas de seguridade do Estado”, dixo sobre o labor que desenvolven.

No salón de sesións do Palacio Municipal de María Pita entregáronse, ademais, medallas e diplomas aos e ás axentes que levan 20, 30, 35 e 40 anos de servizo. Tamén se lle rendeu unha homenaxe aos policías xubilados no ano 2022 coa distinción de policías honoríficos..