Os socialistas coruñeses acordaron iniciar a próxima semana as negociacións co BNG para lograr un acordo de investidura, “sen marcar liñas vermellas nin fórmulas preestablecidas”, sinalan tras a reunión da comisión executiva.

Nela, a alcaldesa e secretaria xeral do PSdeG da Coruña, Inés Rey, asegurou, tras o resultado das eleccións municipais nas que o PSOE obtivo 11 concelleiros, dous edís máis que nos anteriores comicios, que a cidade “apostou claramente por un goberno de progreso”.

Rey presidiu esta tarde o encontro da executiva local para avaliar os resultados obtidos nas eleccións do pasado domingo e pór en marcha o proceso interno de face á aprobación das listas para as próximas eleccións xerais.

Na reunión destacou que o PSdeG conseguiu incrementar a porcentaxe de votos obtidos na cidade herculina, “con menor participación e nun contexto xeral de baixada de apoio ao PSOE”.

“A Coruña foi a única alcaldía socialista das capitais de provincia de toda España que conseguiu dous concelleiros máis polo que temos que estar satisfeitos e valorar ao apoio que recibimos”, sinalou.