O portavoz en funcións do goberno local da Coruña, o socialista José Manuel Lage, e a concelleira electa do BNG Avia Veira aseguraron, sobre a primeira reunión convocada este xoves no marco das negociacións para conformar o goberno na Coruña, que afrontan este proceso con “ánimo de diálogo” e con “a man tendida”.

A preguntas dos xornalistas, Veira manifestou que a posición do seu partido é negociar “con todo o ánimo do mundo e a mente aberta”. “Temos o mandato da sociedade de dialogar”, puntualizou, á vez que engadiu que a deste xoves é “unha primeira reunión e non será a única”.

Lage, pola súa banda, recalcou que a negociación, no seu caso, será “coa man tendida e facendo do diálogo unha ferramenta para seguir construíndo cidade”. “Coa vontade de abrir un espazo de diálogo co BNG, sabendo que hai unha maioría clara de esquerdas na cidade”, recalcou o socialista, quen apelou á “tradición de encontro” entre o seu partido e os nacionalistas.

O tamén secretario de Organización do PSdeG lembrou, a este respecto, que no ámbito galego xa hai un acordo marco global “para favorecer os gobernos progresistas, que son os que van facilitar que o PSOE teña máis de 100 alcaldías en Galicia e o BNG tamén teña un número relevante”.

“Somos forzas políticas diferentes, temos programas diferentes, pero podemos ter elementos en común, e o que debemos é pór por encima de todo os intereses dos coruñeses“, manifestou.