O actual presidente en funcións da Deputación da Coruña e alcalde das Pontes, Valentín González Formoso, foi proposto na tarde deste martes polo comité provincial do PsOE coruñés como candidato a revalidar a presidencia da institución provincial no próximo mandato.
A candidatura de Formoso foi aprobada por aclamación nunha reunión na que o secretario provincial, Bernardo Fernández, destacou que os gobernos da Deputación da Coruña presididos polos socialistas nos últimos anos “supuxeron importantes avances” para os municipios da provincia.
Pola súa banda, González Formoso destacou que este martes se dá “un paso máis” na consolidación do proxecto que xa leva uns anos “cambiando esta provincia e a propia institución” e avanzou que darán prioridade ás políticas para facer fronte ao reto demográfico.
Ademais da aprobación do candidato á presidencia da Deputación da Coruña, a executiva provincial aprobou tamén por unanimidade os nomes do dez deputados e deputadas que integrarán o Grupo Provincial Socialista na Deputación da Coruña tras as eleccións municipais do próximo 28 de maio.
A proposta tamén foi aprobada por unanimidade tras a celebración de reunións dos concelleiros socialistas electos en cada un dos partidos xudiciais da provincia.
En concreto, trátase de Valentín González Formoso e Rosa Ana García López (concelleira en Valdoviño), polo partido xudicial de Ferrol; Mónica Ródríguez Ordóñez (alcaldesa de Vimianzo), polo partido xudicial de Corcubión; Antonio Leira Piñeiro (edil en Oroso) e María del Mar García Vidal (concelleira en Negreira), polo partido xudicial de Santiago; Bernardo Fernández Piñeiro (alcalde de Pontedeume e secretario provincial do PSdeG-PSOE), polo partido de Betanzos; José Manuel Lage Tuñas e Yoya Neira (concelleiros na Coruña), José Ramón Rioboo (alcalde de Culleredo) e Cristrina Capelán (concelleira o Cerceda), polo partido xudicial da Coruña.
