Miles de persoas saíron ás rúas da Coruña convocadas pola asociación Alas para celebrar o orgullo de “ser diversos” e animaron a plantar cara “ao fascismo” que normaliza os “discursos do odio” e cuestiona a consecución de dereitos para o colectivo LGTBI+ logrados tras décadas de loita.

No día en que se celebra o Día do Orgullo, a manifestación reuniu a centenares de persoas que percorreron as rúas da cidade herculina desde a praza de Ourense para culminar na praza de María Pita, onde portavoces de Alas leron un manifesto no que se alertou do aumento dos discursos retrógrados cara ás persoas LGTBI, migrantes ou refuxiadas.

Antes, a marcha, á que asistiron persoas dun amplo abanico de idades, transcurriu en ton festivo polo centro coruñés presidida por unha pancarta na que se podía ler ‘Orgullo LGBTI+: Revoltas do pasado, celebración do presente e conquistas do futuro’.

Ao longo da marcha coreáronse lemas contra a regresión dos dereitos e os ataques verbais e físicos, que os manifestantes atribúen á “normalización” de discursos “LGTBIfóbicos” dos que responsabilizan a partidos como Vox e o seu “socio” o Partido Popular.

Os participantes exhibiron pancartas nas que podía lerse ‘Os nosos dereitos non se tocan’, ‘Se todes molestache, de cristal es ti’ ou ‘Non existe o orgullo hetero porque a ti non te pegan, insultan ou asasinan por selo’.