Os usuarios que elixen o autobús este verán para ir á praia de Oleiros triplicáronse tras o reforzo dos servizos levados a cabo pola Xunta ao areal de Santa Cristina. En concreto, informou a Xunta, na primeira quincena do mes de xullo case 2.100 eusuarios colleron o autobús autonómico ou baixaron na parada da praia de Santa Cristina, 1.300 persoas máis que no mesmo período do ano anterior, cando se alcanzaron os 800 usuarios.

Así, o número de viaxeiros que empregaron esta parada, que a Xunta activa durante os meses estivais, experimentou un crecemento de ata un 260%.

Para facilitar os desprazamentos á praia este verán entre A Coruña e Oleiros, a Xunta reforzou desde o 15 de xuño os servizos de transporte público autonómico con parada en Santa Cristina, engadindo esa parada nas liñas do corredor A Coruña-Mera.

Este ano, a Xunta adiantou unha quincena a activación das liñas de autobús dirixidas a atender os desprazamentos á praia no ámbito da área da Coruña, que en anos anteriores comezaba o 1 de xullo.

Con este adianto dos reforzos estivais cara ás praias de Oleiros, xa no mes de xuño o transporte público levou ao areal de Santa Cristina a 1.100 usuarios. En total, ata o 15 de xullo, subiron ou baixaron na praia de Santa Cristina 3.200 persoas, unhas 2.400 máis en comparación co ano pasado.