A Xunta de Galicia licitou este mércores a construción de 40 vivendas de promoción pública en terreos localizados no barrio de Xuxán da cidade da Coruña, que suporán un investimento de máis de 7,7 millóns de euros.
A nova promoción, que será a segunda no devandito barrio, situarase nunha parcela de 1.280 metros cadrados. O inmoble contará con 40 vivendas distribuídas en 5 plantas, das cales 30 terán tres dormitorios; cinco serán de catro estancias e outras cinco de dúas habitacións.
Desta maneira, a superficie das vivendas oscilará entre os 66 e os 118 metros cadrados útiles. O edificio disporá de dúas plantas subterráneas, onde se localizarán 88 prazas de garaxe e na planta baixa haberá cinco locais comerciais e 40 trasteiros.
Nun comunicado, a Xunta puxo en valor que na actualidade xa acabou a construción doutras 40 vivendas de promoción pública en Xuxán e está a redactar o proxecto para a construción doutras 58 vivendas, polo que en total son 138 pisos os que se prevén no barrio.
