A Policía Nacional detivo na madrugada do 3 de agosto na Coruña ao autor dun delito de estafa, por supostamente vender móbiles de baixa calidade pero coa aparencia externa de ser un dispositivo de alta gama.
Segundo informa o corpo nacional, a primeira venda realizouse o pasado 31 de xullo, cando a vítima contactou co presunto responsable a través dunha coñecida plataforma de compravenda entre particulares. Concertaron unha cita e fíxolle un pago en persoa de 1.000 euros por un suposto terminal de alta gama.
Posteriormente, o vendedor contactou de novo co comprador para ofrecerlle outro teléfono das mesmas características. A vítima decidiu comprar esoutro móbil, pola mesma cantidade, para un coñecido seu que estaba interesado no produto.
Xa co dispositivo nas súas mans, observou que externamente era idéntico ao anterior, non só no modelo, senón tamén nos números de IMEI e de serie. Por iso, ao sospeitar que podía ser vítima dun delito, decidiu denuncialo ante a Policía Nacional.
Os axentes puideron comprobar que, para perpetrar esta estafa, tanto na embalaxe exterior –aparecía pechada– como na propia carcasa do móbil aparecían estes números idénticos. Ademais, o terminal, a primeira ollada, podería parecer un teléfono de alta gama.
Con todo, constatouse que se trataba dun móbil de inferior calidade, mesmo con outro sistema operativo diferente, pero que fora revestido cunha carcasa similar á dun de alta gama. Ademais, empregaba unha embalaxe falsa.
Por iso, o autor desta suposta estafa foi detido a madrugada do pasado día 3 de agosto e posto a disposición xudicial.
