O Concello da Coruña iniciou as obras de mellora das fachadas da escola municipal infantil do barrio de Palavea “co obxectivo de corrixir as deficiencias presentes na fachada sur do edificio”, informa.

A actuación forma parte do calendario de intervencións previstas polo goberno local para o acondicionamento e mantemento dos centros educativos da cidade.

A fachada do centro presentaba varias deterioracións relacionadas co illamento térmico e humidades, así como pequenas fisuras froito dos efectos da climatoloxía.

A obra, que comezou a pasada semana, ten unha duración estimada de seis semanas para a súa execución e conta cun orzamento de 82.860 euros. De acordo co calendario escolar, o inicio do curso nas escolas infantís municipais está previsto para o 6 de setembro.