Fermosa e emotivísima homenaxe a Mangüi a celebrada este pasado domingo en María Pita que serviu ademais de inmellorable peche a un mes de festas. O carismático ex baixista dos Diplomáticos de Monte Alto foi lembrando por grandes referencias da música da cidade.
María Pita converteuse nunha pequena Agra do Orzán lembrando temas da mítica banda fundadora do bravú e ondeando o lema da sesión “Sempre en nós”. O propio Xurxo Souto comparte con nós esta crónica:
Non queríamos unha homenaxe. Dixemos que queriamos armar para Mangüi unha gran celebración, e abofé que, entre todas, o conseguimos. Noite revolucionaria: no nome de Mangüi, o talento dos barrios ocupou, por fin, a gran praza da cidade.
Alí estabamos, enriba e abaixo do escenario, nós. Esas familias obreiras que viñeron das aldeas para traballar na beira do mar. Deses barrios saíu o talento que ía mudar a música galega: Unha rapaza dos Castros: Mercedes Peón; Bieito Romero (co seu fillo, Bieito) da Agra do Orzán; de Labañou, Paco Lodeiro; e unha boa representación de Monte-Alto, os Diplomáticos.
Tamén unha boa presenza da bohemia coruñenta: Miguelón, José Brea, Carlos de la O, Nacho Jarvanzo Negro… E grandes nomes deste país -Uxía, Antón Reixa, Xosé Manuel Pereiro- unidos cun vencello de amor con Mangüi.
Emoción a eito, si. Mais tamén un espectáculo musical en clave de excelencia: No escenario unha auténtica selección galega de talento. Ou o que o mesmo, mais compañeiras e compañeiros de Mangüi: “A orquestra bravú”, dirixida por outro da Agra do Orzán, Richi Casás.
Como comentamos dende o palco, é moi difícil expresar con palabras a ausencia dun amigo. Mais onte foi moi fácil: onde hai música, onde hai cariño, onde hai amizade, aí esta Mangüi.
Por iso a celebración de María Pita, non principiou en María Pita. Comezou dúas horas antes, na Agra do Orzán. O seu irmán David colleu o seu baixo e dende A Reserva -bar tan querido para Mangüi- saímos, camiñando. Un grupo cada vez máis grande polas rúas da Coruña, até realizar en María Pita unha auténtica entrada triunfal.
David pousou o baixo no escenario e principiou a celebración. Noite Marabillosa. Mangüi, sempre en nós!
Así se viviu o concerto-homenaxe polas redes:
E así foi a paradiña na Buserana!! pic.twitter.com/GWXOtB9Wrf
— Xornal da Coruña (@xornaldacoruna) August 21, 2023
Hoxe en praza de Maria Pita concerto homenaxe a Mangui dos Diplomaticos de Monte Alto con Reixa, Radio Oceano, Mercedes Peon…..@ConcelloCoruna @sihomesi @Anton_Reixa @mercedespeon @SXurxo pic.twitter.com/O6WLYeMpX8
— Xurxo Lobato (@XurxoLobato) August 20, 2023
Homenaxe a Mangui praza Maria Pita festas da Coruña Diplomaticos de Monte alto , Reixa e Xose Manuel Pereiro man a man cunha cumbia @filmanova @sihomesi @ConcelloCoruna pic.twitter.com/rIlN2NiZfS
— Xurxo Lobato (@XurxoLobato) August 20, 2023
Vaia descarga de adrenalina na sentida lembranza a Mangüi. Que fermoso vivir este momento… ❤ pic.twitter.com/4bou6C0ggL
— Antonio Prado (@antonioprado___) August 20, 2023
