A Fundación Marta Ortega exhibirá en novembro na Coruña unha mostra sobre o fotógrafo xermano-australiano Helmut Newton, segundo informa na súa web. Será a partir do 18 de novembro cando o centro MOP, situado no porto, acollerá a exposición dedicada á vida e a obra do fotógrafo, nacido en 1920 e falecido en 2004.
A mostra, que poderá visitarse ata o 1 de maio do próximo ano, seguirá o ronsel das dedicadas con anterioridade a Peter Lindbergh e Steven Meisel. Esta será a terceira exposición promovida pola Fundación MOP, nunha iniciativa impulsada en colaboración coa Fundación Helmut Newton e comisariada por Philippe Garner, Matthias Harder e Tim Jefferies.
