Naturgy impulsa o primeiro proxecto de BioGNL en España, en concreto na Coruña, para acelerar a descarbonización do transporte, segundo informa.
O BioGNL é biometano, un gas renovable producido a partir da valorización de residuos, que neste caso se licua para transportalo ata o consumidor final, un proceso que a compañía cualifica de “fundamental” para impulsar a descarbonización do transporte.
Para iso, a compañía informa que xa asinou o primeiro contrato de compra a longo prazo de gas renovable en estado líquido. O acordo levará a compra dunha produción de 25 GWh anuais de BioGNL obtido na planta de valorización de residuos de Sologas nas Somozas, cuxa entrada en operación está prevista para finais de 2023.
ADDSynergy, do Grupo Pietro Fiorentini, será a empresa encargada da implementación dun proceso “que permitirá obter de forma integrada BioGNL e CO 2 líquido para conseguir a captura de CO 2 e o incremento de calidade do BioGNL”.
Esta captura concederá unha intensidade de carbono negativa ao produto, “o que supón un fito moi relevante para cumprir cos obxectivos de descarbonización comprometidos por España”, sinala a empresa.
