O deputado do BNG no Congreso, Néstor Rego, informou á Confradía da Ría do Burgo das iniciativas rexistradas para que o Goberno manteña as axudas ao sector ata a recuperación íntegra da capacidade produtiva.
A organización nacionalista demandará, a través dunha proposición non de lei, alongar as axudas entre 18 e 24 meses, desde que se semente o marisco ata que poida ser recolleito.
Na reunión coa Confraría da Ría do Burgo, ademais do deputado nacionalista no Congreso, tamén participaron o portavoz municipal do BNG na Coruña, Francisco Jorquera, e a concelleira e deputada no Parlamento de Galicia, Mercedes Queixas.
A organización nacionalista aproveitou o encontro para trasladar as iniciativas rexistradas na Cámara baixa para que o Ministerio alongue as axudas percibidas polos mariscadores e mariscadoras unha vez finalizadas as obras de dragado da Ría do Burgo.
O prazo de finalización das obras na ría e, por tanto, das axudas recibidas polo sector marisqueiro, termina o 31 de decembro de 2023. Con todo, a partir dese momento o BNG considera que aínda serían necesarios os apoios entre 18 e 24 meses, desde que se semente o marisco ata que poida ser recolleito.
“A preocupación é saber se o Ministerio vai prorrogar estas axudas para cubrir tamén ese período, entre 2024 e 2025, ou se, ao contrario, pretende que durante este tempo os mariscadores estean sen ningún tipo de ingreso”, apunta o deputado do Bloque.
Para Rego, esta último opción “sería inaceptable”. De decidir esta última opción, continúa Rego, “sería inaceptábel”. “Rexistraremos unha proposición non de lei, acordada cos mariscadores e mariscadoras, instando o Goberno a que, de forma urxente, adopte a decisión de prorrogar as axudas”, avanza o parlamentario, que se compromete a “facer todas as xestións necesarias para conseguilo”.
