A alcaldesa da Coruña, Inés Rey, denunciou “inacción” por parte da Xunta “nas competencias que ten en materia educativa, incluíndo as infraestruturas”, nunha visita ao CEIP Manuel Murguía con motivo do inicio do curso escolar. En declaracións aos xornalistas, aludiu á “desidia” por parte do Executivo galego en relación ao mantemento dos centros e asegurou que, por ese motivo, o goberno local está a preparar un informe “con todas as necesidades dos centros para trasladalo á Xunta”.

“E que asuma as súas competencias e póñanse a traballar para mellorar a educación pública”, sentenciou a rexedora que dixo que se está facendo o citado informe en colaboración cos centros. Mentres, destacou as actuacións acometidas polo consistorio. “Este verán 135 actuacións, que se unen 1.840 que se fixeron durante todo o período escolar”, resumiu.

Noutra orde de cousas, e cuestionada sobre a implantación na cidade do quinto colector, para reciclar os biorresiduos, como establece a normativa europea, defendeu que na planta de tratamento de lixos de Nostián hai unha porcentaxe “elevadísima” de recuperación de envases. Non entanto, asegurou que se traballa na “actualización” de Nostián ante os novos requirimentos e tamén na licitación do novo contrato.