A conselleira de Economía, Industria e Innovación, María Jesús Lorenzana, reuniuse este venres coa directiva da Autoridade Portuaria da Coruña para avaliar o estado dos proxectos que están interesados en implantar no porto exterior da Coruña. Segundo informa a Consellería, Xunta e Autoridade Portuaria apostan por facer de Punta Langosteira un “hub de descarbonización, industrial e loxístico”.

Para conseguilo, engade, “está a avanzarse na atracción de proxectos centrados en conseguir un porto autosuficiente, na produción de biocombustibles e de hidróxeno para uso industrial e mobilidade“. Tamén no desenvolvemento da eólica mariña e na modernización e dixitalización de operacións. “Iniciativas que terán impacto na xeración de emprego, a redución de emisións de CO2 e no impulso da transición ecolóxica”, apostila a Consellería.