O Concello da Coruña adxudicou os traballos para a nova glorieta das Rañas. Esta rotonda, segundo o goberno local, permitirá “mellorar a mobilidade e a seguridade” nun enclave “exposto a diario a un intenso tráfico, especialmente no referente a vehículos pesados”.

A mesma estará localizada na estrada baixo a AC-14, e conectará o polígono de Pocomaco, o núcleo das Rañas e a zona comercial de Agrela. Esta intersección, engade o consistorio, “con gran fluxo de desprazamentos esixía unha remodelación en termos de visibilidade” tanto para o tráfico rodado como para os peóns.

A nova glorieta, explica, ocupará a mesma superficie que a existente na actualidade. Procederase, ademais, a unha “reordenación dos espazos peonís coa instalación de pasos de peóns elevados, así como coa mellora e ampliación das beirarrúas, coa súa adaptación aos estándares normativos de accesibilidade”.

Está prevista, tamén, a instalación de novos elementos de sinalización para conseguir unha “mellor seguridade” e a renovación da iluminación. A construción da nova rotonda terá un prazo de execución de 6 meses.