Inspección de Traballo levantou acta de infracción contra o Instituto Policlínico Santa Teresa, do Grupo Quirón, na Coruña, “pola comisión dunha infracción grave ao carecer dun plan de igualdade negociado para o seu persoal”, informa a CIG.
“A sanción económica derivada da infracción no seu grao mínimo pode consistir en 751 euros de multa ata os 7.500 euros no seu grao máximo, tal e como figura na Lei de Infraccións e Sancións na orde social”. Nun comunicado, a central sindical sinala que isto supón “unha importante advertencia para a empresa e reviste un carácter exemplarizante para outras que se atopen na mesma situación”.
Ademais, sinala que “despois de varios anos tentando negociar o plan de igualdade de oportunidades para mulleres e homes, a representación sindical da CIG no Santa Teresa presentou denuncia na Inspección de Traballo reclamando a actuación do organismo ao carecer a empresa do obrigado plan”.
